Կայացել է ԱԵԳՄՄ-ի տարեվերջյան նիստը և «Գիտական Արցախ» պարբերականի հերթական համարի քննարկումը

Կայացել է ԱԵԳՄՄ-ի տարեվերջյան նիստը և «Գիտական Արցախ» պարբերականի հերթական համարի քննարկումը

Դեկտեմբերի 27-ին Վալլեքս Գարդեն հոթելի փոքր կոնֆերենս դահլիճում տեղի է ունեցել «Արցախի երիտասարդ գիտնականների և մասնագետների միավորում» (ԱԵԳՄՄ) հասարակական կազմակերպության հերթական նիստը և Կազմակերպության նախագծերից «Գիտական Արցախ» պարբերականի 2019 թվականի 2-րդ համարի քննարկումը:

Հանդիպմանը ներկա էին ԱԵԳՄՄ անդամներն ու հոդվածագիրները:

Ողջունելով գործընկերններին՝ ԱԵԳՄՄ հիմնադիր նախագահ, ի.գ.թ., դոցենտ Ավետիք Հարությունյանը շնորհակալություն է հայտնել ներկաներին հերթական նիստին և պարբերականի քննարկմանը մասնակցելու համար:

Տարեվերջյան նիստը հրավիրվել է՝ ամփոփելու 2019 թվականին իրականացված աշխատանքները և հստակեցնելու հաջորդ տարվա անելիքները: «2019 թվականին տպագրվել է «Գիտական Արցախ» պարբերականի թվով 2 համար, կազմակերպվել է «Հայոց պետականության անցյալը, ներկան ու ապագան» միջազգային երիտասարդական 4-րդ գիտաժողովը, որին մասնակցել են 114 մասնակիցներ աշխարհի 8 երկրներից, կնքել ենք համագործակցության հուշագրեր Հայաստանի առաջատար բուհերի հետ, կազմակերպել ենք կորպորատիվ սոցիալական պատասխանատվությանը նվիրված գիտագործնական կոնֆերանս, Արցախի բոլոր 7 շրջկենտրոններում, Հայաստանի 7 և Արցախի 3 բուհերում կազմակերպել ենք «Արցախի էլեկտրոնային գրադարան» կայքի հանրայնացմանը միտված շնորհանդեսներ, որոնց ընդհանուր թվով մասնակցել են ավելի քան 2.000 հոգի»:

ՀՀ ԲՈԿ-ի պահանջներին համապատասխանող՝ դոկտորական և թեկնածուական ատենախոսությունների հիմնական արդյունքների ու դրույթների հրատարակման համար ընդունելի գիտական պարբերականների ցանկում ընդգրկված «Գիտական Արցախ»-ի 2019 թվականի երկրորդ համարում տեղ են գտել հասարակական գիտությունների արդի հիմնախնդիրների վերաբերյալ Հայաստանի Հանրապետությունը, Արցախի Հանրապետությունը, Գերմանիայի Դաշնային Հանրապետությունը, Իրանի Իսլամական Հանրապետությունը, Լեհաստանը, Հարավային Օսեթիան, Ռուսաստանի Դաշնությունը և Ուկրաինան ներկայացնող մոտ 50 անվանի ու երիտասարդ գիտնականների աշխատանքները:

Հոդվածագիրներից 5-ը գիտությունների դոկտորներ են, 18-ը՝ գիտությունների թեկնածուներ, 20-ը՝ ասպիրանտներ, իսկ 6-ը` մասնագետներ և մագիստրանտներ:

ԱԵԳՄՄ-ականները քննարկման ընթացքում իրենց ելույթներում կարևորել են «Գիտական Արցախ»-ի ունեցած դերը գիտության զարգացման ու հանրայնացման գործում: «Վերջին տարում բավականին առաջընթաց ենք ունեցել. մեծացել է հուշագրերի թիվը: Մեր կատարած աշխատանքով նպաստում ենք Արցախի միջազգային ճանաչմանը, որովհետև տարբեր երկրների գիտաշխատողներ հանդես են գալիս հոդվածներով, մասնակցում են կազմակերպության նախաձեռնած գիտաժողովներին, և այդ նյութերը հետագայում հայտնվում են տվյալ երկրների գրադարաններում, ինչը պետականամետ գործունեություն է»,- ընդգծել է պ.գ.թ., ԱրՊՀ դասախոս Իսկուհի Ավանեսյանը:

Խոսելով պարբերականի առաքելության, նպատակների և ընթացիկ աշխատանքների մասին՝ ԱԵԳՄՄ նախագահ, «Գիտական Արցախ»-ի գլխավոր խմբագիր Ավետիք Հարությունյանը նշել է, որ «Գիտական Արցախ»-ի լույսընծայումն ու տարածումը լիովին համապատասխանում է Կազմակերպության հիմնական առաքելությանը, այն է` գիտության դիվանագիտության միջոցով նպաստել Արցախի միջազգային ճանաչմանը:

Հանդիպման ավարտին պարբերականի գլխավոր խմբագիր Ավետիք Հարությունյանը շնորհակալություն է հայտնել «Գիտական Արցախ»-ի խմբագրական խորհրդի բոլոր անդամներին, գրախոսներին, հոդվածագիրներին, հայերեն, ռուսերեն ու անգլերեն լեզուների պատասխանատուներին` արհեստավարժ աշխատանքի և արձանագրած արդյունքների համար:

Նա նաև նշել է, որ 2020 թվականը հոբելյանական է Կազմակերպության համար, քանի որ հունվարի 13-ին լրանում է հիմնադրման 5-ամյակը, իսկ սեպտեմբերին կազմակերպվելու է հոբելյանական 5-րդ գիտաժողովը:

738
Բաժանորդագրվեք ArtsakhLib կայքի նորություններին
Լավագույն հոդվածները ստացեք էլեկտրոնային փոստով
mailbox