Ստեփանակերտում մեկնարկել է միջազգային երիտասարդական 4-րդ գիտաժողովը

Ստեփանակերտում մեկնարկել է միջազգային երիտասարդական 4-րդ գիտաժողովը

Սեպտեմբերի 13-ին «Վալլեքս Գարդեն» հոթելի կոնֆերենս դահլիճում մեկնարկել են «Հայոց պետականության անցյալը, ներկան ու ապագան» խորագրով միջազգային երիտասարդական 4-րդ գիտաժողովի աշխատանքները՝ նվիրված Երևանի պետական համալսարանի հիմնադրման 100-ամյակին:

«Արցախի երիտասարդ գիտնականների և մասնագետների միավորում» (ԱԵԳՄՄ) հասարակական կազմակերպության նախաձեռնությամբ արդեն 4-րդ տարին Հայոց պետականության անցյալի, ներկայի և ապագայի շուրջ գիտագործնական մտորումներով կիսվելու հնարավորություն են ստանում աշխարհի տարբեր երկրների երիտասարդ և ավագ սերնդի գիտնականներ, ովքեր միաժամանակ իրենց ներդրումն են ունենում Արցախում գիտական դիվանագիտության զարգացման գործում:

Գիտաժողովի կազմկոմիտեի նախագահ, ԱԵԳՄՄ հիմնադիր նախագահ, ի.գ.թ., դոցենտ Ավետիք Հարությունյանի խոսքով, գիտաժողովին մասնակցության հայտ են ներկայացրել թվով 111 գիտնականներ և մասնագետներ Գերմանիայից, Ֆրանսիայից, Լեհաստանից, Ռուսաստանից, Ուկրաինաից, Հարավային Օսեթիայից, Հայաստանից և Արցախից:

«Այն, որ արդեն 4-րդ անգամ է Արցախում կազմակերպվում նման մեծամասշտաբ ու նպատակադիր միջոցառում, խոսում է գաղափարի պահանջվածության, կարևորության, գիտական արդյունքների բազմակողմանիության, գիտաժողովի գիտագործնական նշանակության ու առաքելության մասին: Նախորդ 3 տարիների ընթացքում բավականին լայն աշխարհագրությամբ գիտաժողովին մասնակցել են 250-ից ավելի գիտնականներ ու մասնագետներ, որոնց թիվը տարեցտարի ավելանում է: Այս տարվա մասնակիցների հետ միասին 4 տարիների ընթացքում գիտաժողովին մասնակցել են 360 անվանի և երիտասարդ գիտնականներ: Իհարկե, իրողությունը կարևորելի է ոչ այնքան թվաքանակային, որքան բովանդակային առումով»,- բացման խոսքում ասել է գիտաժողովի կազմկոմիտեի նախագահ Ա. Հարությունյանը:

Լիագումար նիստին զեկուցումներով հանդես են եկել արտասահմանից ժամանած գիտական մտքի առաջատարներ, որոնք անդրադարձել են հայոց պետականության տարբեր ասպեկտներին, ներկայացրել իրենց տեսլականը դրա ներկայի, անցյալի և ապագայի վերաբերյալ: Գիտաժողովի աշխատանքներն անվանի մասնագետների և գիտնականների նախագահությամբ շարունակվում են իրավագիտության, քաղաքագիտության, պատմության, տնտեսագիտության, արվեստագիտության, գրականագիտության, լրագրության և մանկավարժության, մասնախմբերում: Այս տարի կազմկոմիտեն մի շարք նորամուծություններ է մտցրել ծրագրում: Մշակութային ծրագիրը համալրվել է թանգարանային մի քանի այցելություններով, նախատեսվում է մամլո ասուլիս՝ հայ և օտարերկրյա գիտնականների մասնակցությամբ, հանդիպում ԱՀ Նախագահի և պետական նախարարի հետ, ինչպես նաև գալա ընթրիք և պարգևատրման արարողություն:

Հիշեցնենք, որ գիտաժողովն իրականություն է դարձել ԱՀ Կառավարության, ՀՀ սպորտի և երիտասարդության հարցերի նախարարության և «Վալլեքս Գարդեն Հոթել» ՓԲԸ-ի ֆինանսական աջակցությամբ, ինչպես նաև Երևանի պետական ու Ստեփանակերտի Մեսրոպ Մաշտոց համալսարանների համակազմակերպմամբ:

 

Լուսանկարները՝ Արցախպրես լրատվական գործակալության

256
Բաժանորդագրվեք ArtsakhLib կայքի նորություններին
Լավագույն հոդվածները ստացեք էլեկտրոնային փոստով
mailbox