Կայացել է իրավագիտակցության հիմնախնդիրին նվիրված գրքի շնորհանդես-քննարկում

Կայացել է իրավագիտակցության հիմնախնդիրին նվիրված գրքի շնորհանդես-քննարկում

Դեկտեմբերի 10-ին ԱԵԳՄՄ նախաձեռնությամբ Ստեփանակերտում կայացել է Կազմակերպության երեք անդամների հեղինակությամբ լույս տեսած «Իրավագիտակցության հիմնախնդիրն Արցախի Հանրապետության հանրակրթական և բարձրագույն ուսումնական հաստատություններում» կոլեկտիվ մենագրության շնորհանդես-քննարկումը, որին մասնակցում էին իրավաբանական համայնքի ներկայացուցիչներ, ոլորտի նախկին և ներկա պատասխանատուներ, ԱԵԳՄՄ անդամներ, ուսանողներ:

Արժեվորելով դեկտեմբերի 10-ի խորհուրդը՝ Սահմանադրության, Անկախության հանրաքվեի և Մարդու իրավունքների պաշտպանության միջազգային օրերի նշանակությունը, ներկաներն այն համոզմունքն են հայտնել, որ բոլորիս գերնպատակն է կենսագործել երկրի մայր օրենքի դրույթները և դրանք դարձնել ապրող իրողություններ:

ԱԵԳՄՄ հիմնադիր նախագահ, ի.գ.թ., դոցենտ Ավետիք Հարությունյանի, ԱԵԳՄՄ հիմնադիր, ի.գ.թ. Սիրանուշ Պետիկյանի և ԱԵԳՄՄ անդամ, արդարադատության նախարարության առաջին կարգի մասնագետ Լուսինե Բարխուդարյանի աշխատասիրությամբ լույս տեսած գրքի ասելիքին նախ անդրադարձավ շնորհանդեսի կազմակերպիչ և վարող, ԱԵԳՄՄ անդամ Անուշ Դոլուխանյանը. «Հասարակությունը, մասնավորապես երիտասարդությունն է, որ պետք է ստանձնի ավագ սերնդի կատարած աշխատանքի տրամաբանական ու հետևողական իրականացումը և միաժամանակ ապահովի պետության անվտանգությունն ու բնականոն իրավական զարգացումը, ուստի դպրոցական և ուսանողական նստարանից անհրաժեշտ է սերմանել օրենքը հարգելու և դրան հետևելու հիմքերը, ինչի համար հող է նախապատրաստել սույն աշխատանքը՝ վերհանելով առկա խնդիրներն ու դրանց հաղթահարման ուղիները»:

Արցախի Հանրապետության վաստակավոր իրավաբան Վլադիմիր Հովսեփյանը, դառնալով համահեղինակությամբ իրականացված հսկայական աշխատանքին, ասում է. «Գիրքը կգա լրացնելու իրավագիտության աղքատիկ պարտեզը: Խորհուրդ կտայի չսահմանափակվել սույն ուսումնասիրությամբ և շարունակել զարգացնել ընտրված թեման»:

Արցախի Հանրապետության վաստակավոր իրավաբան, ի.գ.թ. Գրետա Արզումանյանն ու ԱՀ ընդհանուր իրավասության առաջին ատյանի դատարանի նախագահ, ի.գ.թ., դոցենտ Անատոլի Թադևոսյանը համակարծիք են այն հարցում, որ հեղինակները նպատակային խնդիրներ են առաջադրել և դրանք լուծել հաջողությամբ:

«Գնահատելի է հատկապես այն, որ գրքի հեղինակները գնահատել են ոչ միայն սովորողների, այլև սովորեցնողների՝ ուսուցիչների և դասախոսների իրավագիտակցության մակարդակը և առաջարկել կատարելագործման մեխանիզմներ»,- նշել է Գ. Արզումանյանը:

«Թվում է գիտությամբ զբաղվելն այնքան էլ հարգի չէ, սակայն այսօր երիտասարդ հեղինակներն ապացուցեցին, որ նպատակն ավելին է, քան պարզապես զբաղմունքը»,- ասում է Ա. Թադևոսյանը՝ մատնաշնելով աշխատության տեսական և գործնական լայն  նշանակությունը:

Անդրադառնալով գրքի խնդիրներին և նպատակներին՝ հեղինակներից Ա. Հարությունյանը նշում է, որ առանձին գլուխներում շոշափվում են Հանրապետության հանրակրթական և բարձրագույն ուսումնական հաստատություններում սոցիոլագիական հարցման եղանակով իրականացված ուսումնասիրության մանրամասները՝ ընթացքից մինչև արդյունք: Վերջաբանում ամփոփված են երկամյա ժամակահատվածում կատարված հետազոտության արդյունքներն ու համապատասխան առաջարկությունները, որոնք կարող են նպաստել բարձրացված հիմնախնդիրների լուծմանը:

«Հավելվածներ բաժնում առաջարկվում է ծանոթանալ մեր կողմից մշակված «Արցախի Հանրապետության քաղաքացիների իրավական իրազեկվածության, իրավական գրագիտության և իրավագիտակցության մակարդակի բարձրացման» հայեցակարգին, որը կարող է հիմք հանդիսանալ տվյալ ոլորտում պետական քաղաքականության մշակման ու իրագործման համար»,- ամփոփում է համահեղինակը:

Համահեղինակ Լ. Բարխուդարյանն էլ հետազոտության եղանակներն է մանրամասնում. «Սոցիոլոգիական հարցման եղանակով ուսումնասիրություն ենք իրականացրել մայրաքաղաքի և շրջանների աշակերտների, ինչպես նաև ուսանողության շրջանում՝ բացահայտելով առկա բացերը, դրանց առաջացման պատճառներն ու վերացման եղանակները»:

Ծավալված մասնագիտական քննարկումից հետո հեղինակները սեփական մակագրությամբ գրքեր են նվիրել ներկաներին:

Նշենք, որ հետազոտությունն իրականացվել է ԱՀ ԿԳՍ նախարարության հայտարարած մրցույթի շրջանակներում:

Ի դեպ, Արցախի երիտասարդ գիտնականների և մասնագետների միավորումը նաև պատրաստակամություն է հայտնել նպաստել երիտասարդ հեղինակների աշխատությունների հանրայնացմանը շնորհանդեսների, քննարկումների, լուսաբանման և այլ ձևաչափերով:

Լուսանկարները` Արցախպրես լրատվական գործակալության

433
Բաժանորդագրվեք ArtsakhLib կայքի նորություններին
Լավագույն հոդվածները ստացեք էլեկտրոնային փոստով
mailbox