Ստորագրվեց համագործակցության հուշագիր Մեսրոպ Մաշտոց Համալսարանի հետ

Փետրվարի 16-ին Մեսրոպ Մաշտոց Համալսարանի նիստերի դահլիճում տեղի ունեցավ Արցախի Երիտասարդ Գիտնականների և Մասնագետների Միավորման (ԱԵԳՄՄ) ու Ստեփանակերտի Մեսրոպ Մաշտոց Համալսարանի (ՄՄՀ) միջև համագործակցության մասին հուշագրի ստորագրման հանդիսավոր արարողությունը, որին ներկա էին Համալսարանի գիտխորհրդի անդամները:

ՄՄՀ ռեկտոր Դոնարա Գաբրիելյանը, բարձր գնահատելով ԱԵԳՄՄ-ի դերը երիտասարդ գիտնականների և մասնագետների միավորման, նրանց գործունեության հանրայնացման, ինչպես նաև Արցախում տարաբնույթ գիտակրթական բնույթի միջոցառումների կազմակերպման գործում, հույս է հայտնել, որ այսուհետ ևս համատեղ ծրագրերի իրականացումը կկրի շարունակական բնույթ, իսկ Համալսարանն իր հնարավորությունների շրջանակներում պատրաստ է ամեն կերպ աջակցել ԱԵԳՄՄ-ին:

ԱԵԳՄՄ-ի հիմնադիր նախագահ Ավետիք Հարությունյանը Կազմակերպության և անձամբ իր անունից խորին շնորհակալություն է հայտնել ՄՄՀ ողջ անձնակազմին` ռեկտոր Դ.Գաբրիելյանի գլխավորությամբ, ով ԱԵԳՄՄ-ի եռամյա գործունեության ամբողջ ընթացքում գործուն աջակցություն է ցուցաբերել բազմաթիվ ծրագրերի իրականացմանը:

Հուշագրի շրջանակներում երկու կողմերը համագործակցելու են մի շարք, այդ թվում` ԱԵԳՄՄ-ի նախագիծ հանդիսացող Արցախի Էլեկտրոնային Գրադարանի կայքի համար նյութերի տրամադրման և հանրայնացման, ինչպես նաև համատեղ գիտաժողովների, սեմինարների և կլոր սեղանների կազմակերպման ուղղություններով:

Հաջորդ համատեղ ծրագիրը տեղի է ունենալու փետրվարի 24-ին, որի շրջանակներում կազմակերպվելու է «Արցախյան շարժման խորհուրդն ու արդի հիմնախնդիրները» խորագրով գիտաժողով` նվիրված արցախյան շարժման 30-ամյակին: Գիտաժողովին ելույթներով հանդես կգան ՄՄՀ-ի դասախոսներ և հատուկ այդ նպատակով Երևանից ժամանած ԱԵԳՄՄ-ի մի շարք անդամներ, որից հետո վերջիններս դասախոսություններ կկարդան բուհի ուսանողների համար:

Նյութի աղբյուրը` http://aegmm.org/archives/1345

197
Բաժանորդագրվեք ArtsakhLib կայքի նորություններին
Լավագույն հոդվածները ստացեք էլեկտրոնային փոստով
mailbox