ԱԵԳՄՄ-ն 3 տարեկան է

ԱԵԳՄՄ-ն 3 տարեկան է

Ուղիղ 3 տարի առաջ` 2015թ. հունվարի 13-ին, Ավետիք Հարությունյանի և Սիրանուշ Պետիկյանի նախաձեռնությամբ հիմնադրվել է «Արցախի Երիտասարդ Գիտնականների և Մասնագետների Միավորում» հասարակական կազմակերպությունը (ԱԵԳՄՄ)` նպատակ ունենալով միավորել Արցախի երիտասարդ գիտնականներին և մասնագետներին, նպաստել նրանց գիտական և ստեղծագործական զարգացմանը, ձևավորել նրանց մասնագիտական աճի համար բարենպաստ մթնոլորտ, աջակցել Արցախի երիտասարդ գիտնականների և մասնագետների միջազգային ինտեգրմանը, ինչպես նաև ՀՀ-ի և Արցախի հասարակական կյանքին նրանց ակտիվ մասնակցությանը:

Անցած տարիների ընթացքում Կազմակերպությունն Արցախում իրականացրել է մի շարք գիտակրթական ու ռազմահայրենասիրական ծրագրեր, մասնավորապես`

  1. «Գիտության զարգացման հիմնախնդիրներն ու հեռանկարներն Արցախի երիտասարդության շրջանում» խորագրով կլոր սեղան (21.03.2015թ.):
  2. Մեծ Հայրենականին արցախցիների մասնակցության մասին պատմող «70-ամյա հաղթանակի վկաները» ֆիլմի նկարահանում (շնորհանդեսը` 05.05.2015թ.):
  3. «Երիտասարդների իրավագիտակցության մակարդակի բարձրացման հիմնախնդիրը Լեռնային Ղարաբաղի Հանրապետությունում» ուսուցողական դասընթացների շարք, որին մասնակցել են մոտ 30 երիտասարդներ, իսկ դրա շրջանակներում տպագրվել է «Իրավագիտակից երիտասարդ» տեղեկատվական գրքույկը (24.03-02.04.2016թ.):
  4. «ԼՂՀ (Արցախի) 25-ամյա պետականության ձեռքբերումներն ու արդի մարտահրավերները»թեմայով 1-ին միջազգային երիտասարդական գիտաժողով, որին մասնակցել են Գերմանիայից, Լեհաստանից, Ռուսաստանի Դաշնությունից և Հայաստանի Հանրապետությունից ժամանած պրոֆեսորներ և երիտասարդ գիտնականներ (77 մասնակից): Արդյունքներն ամփոփվել են գիտաժողովի նյութերի ժողովածուում (15-18.09.2016թ.):
  5. «Սահմանադրություն և իրավունք» դպրոցականների հանրապետական 1-ին օլիմպիադա, որին մասնակցել են Ստեփանակերտի և Արցախի շրջկենտրոնների թվով 55 աշակերտներ: Հաղթողներն ու բարձր արդյունքներ ցուցաբերած մասնակիցները պարգևատրվել են Օլիմպիադայի հովանավոր Կարեն Սարգսյանի կողմից (28.02.2017թ.):
  6. «Ձեռնարկատիրական գործունեությամբ զբաղվելու հմտությունների ձևավորումը և խթանումն Արցախի երիտասարդության շրջանում» ուսուցողական դասընթացների շարք, որին մասնակցել են մոտ 20 երիտասարդներ, որոնցից մեկն արդեն սկսել է զբաղվել ձեռնարկատիրական գործունեությամբ: Դասընթացի շրջանակներում տպագրվել է «Գործարար ուղեցույց» ձեռնարկը (10-17.06.2017թ.):
  7. «Արցախի Հանրապետության միջազգային ճանաչման հիմնախնդիրներն ու հեռանկարները»խորագրով 2-րդ միջազգային երիտասարդական գիտաժողով, որին մասնակցել են ԱՄՆ-ից, Գերմանիայից, Լեհաստանից, Ռուսաստանի Դաշնությունից և Հայաստանի Հանրապետությունից ժամանած պրոֆեսորներ և երիտասարդ գիտնականներ (63 մասնակից): Արդյունքներն ամփոփվել են գիտաժողովի նյութերի ժողովածուում (14-17.09.2017թ.):
  8. «Պաշտպանության բանակի լավագույն դիրքապահները» ռազմահայրենասիրական ծրագիր, որի շրջանակներում տպագրված գրքում ներկայացված են Արցախի պաշտպանության բանակի 32 ժամկետային զինծառայողների հետ հարցազրույցները` նրանց անցած մարտական ուղու և զինծառայության վերաբերյալ ունեցած դիտարկումների մասին (01.04-31.10.2017թ.):

Կազմակերպությունը մեծապես նպաստել է նրան, որպեսզի Արցախում և Հայաստանում գիտությամբ զբաղվող երիտասարդներն ավելի մոտիկից ճանաչեն իրար, տարբեր ձևաչափերով համագործակցեն իրար հետ, ինչպես նաև փոխանակվեն գիտական տեղեկատվությամբ:

Անցած 3 տարիների ընթացքում ԱԵԳՄՄ-ի անդամները մասնակցել են Արցախում, Հայաստանում և նրա սահմաններից դուրս կազմակերպված միջազգային գիտաժողովների և հանդես եկել զեկույցներով: Կազմակերպության անդամները տպագրել են 1 տասնյակից ավելի գիտական աշխատություններ:

2016թ. փետրվարից գործում է ԱԵԳՄՄ-ի կայքը` www.aegmm.org, որտեղ տեղադրվում է Կազմակերպության գործունեության ու իրականացրած ծրագրերի մասին տեղեկատվություն:

2017թ. փետրվարի 24-ին Կազմակերպությունը Հայաստանի երիտասարդական հիմնադրամի կողմից արժանացել է «Հայկյան-2016» մրցանակի «Լավագույն երիտասարդական հասարակական կազմակերպություն մարզում» անվանակարգում:

Ընթացքի մեջ են մի շարք նախաձեռնություններ, որոնք միտված են Արցախում գիտության զարգացմանն ու դրանով իսկ երկրի միջազգային ճանաչմանը նպաստելուն:

 

Նյութի աղբյուրը` http://aegmm.org/archives/1313

189
Բաժանորդագրվեք ArtsakhLib կայքի նորություններին
Լավագույն հոդվածները ստացեք էլեկտրոնային փոստով
mailbox